曹仁超 - 美減息周期近尾聲(4 Apr 2008)


　　4月3日，周四。今天恒生指數升392.2，收24264.63；成交914.95億元。恒指已略高於250天線24139.61，呢次到底係同250天線吻別，抑或係熊市响3月18日結束？4月期指高水，升419點，收24220點。

　　滬深三百指數出現50天線跌穿250天線後，進入熊市二期反彈，今天升102.72。

中國重演政策失誤致惡性通脹　　一年前投資者仲係滿懷熱情，因滬深三百A股响兩年內上升500％，掀起全民炒股狂潮。雖然專家們接二連三提出警告，但股市卻一再創新高，警告股市泡沫者都成為被嘲笑對象，每個人都高談闊論自己賺咗幾多錢、仲準備再投幾多錢入去。去年9月我老曹一家人到上海玩，晚上做腳底按摩時，四個盲人喺度高談闊論自己嘅投資心得，電視機播映一名浙江大學經濟系教授勸投資者小心，一位盲人說「開眼嘅人又點夠盲眼人心水清」！

　　去年10月17日滬深A股由5891.72回落，由於內地人從未見過超級大熊市，認為只係健康調整，11月底大量資金入市，股市又止跌回升。根據JP 摩根證券分析師李晶估計，內地公司將擁有嘅閒置資金都投入股市，去年12月底股民人數達一億五千萬。到2008年首季，滬深A股指數卻由2008年1月 14 日5756點回落到4月3日3457點才反彈，一季跌幅高達39.9％，好多散戶血流成河。

　　今年第一季人民幣升值4％，內地銀行手上外滙儲備400億美元，賬面上損失幾多？家吓困局係人民幣缺乏有效對沖工具，如人民幣加快升值，對內地銀行純利壓力都幾大。

　　大摩羅奇話，1970年代美國迷信核心通脹理論，導致財政政策嚴重失誤，令短期利率變成負利率，因此無法壓抑通脹率，引發七十年代惡性通脹。估唔到上述政策失誤今天响中國重演，中國一年期存款利率只有4.1％，CPI升幅卻高達8.7％，形成泡沫經濟。如未來任由人民幣升值，將令股市、樓市出現重大損失；如任由負利率情況維持落去，內地通脹問題則無法解決。

　　信貸壓縮（Credit crunch）開始影響造船業，唔少造船訂單被取消。





A股仍缺乏吸引力

　　滬深A股今年首季跌幅接近40％，令A股平均O由去年10月超過三十五倍回落到較合理嘅二十倍（以估計純利計）。二十倍O到底能否企穩？以五十隻最活躍 A股市值同香港H股比較，仍高出80％到120％，因為H股早由去年11月回落，令A股回落冇拉近同H股股價嘅差距（今年1月A股股價更一度高出H股 120％）；响過去正常時期，A股只高出H股20％至40％。站喺純投資角度睇，A股仍缺乏吸引，短期升降又係另一回事。

　　IMF將今年全球GDP增長率由4.1％下調至3.7％，為2002年以來最慢增速。IMF認為，受次按危機影響，全球經濟已逐漸喪失增長動力，明年增長率下滑至3％嘅機會率已上升到25％（如全球GDP增長率只有3％，代表世界經濟陷入衰退期），並將美國GDP增長率由1.5％降至0.5％、歐羅區降至1.3％、亞洲區降至7.6％。

　　萊斯TSB被高盛降級而回落，BNP百利達亦回落。美國次按危機漸漸影響歐洲銀行股，例如瑞士聯合再跌3.9％，收 32.66瑞郎，因估計今年陷入虧損。索羅斯形容呢次次按危機係美國1930年以來最惡劣嘅一次，佢認為近日回升只係風眼，並計劃寫書去解釋呢次次按危機嘅形成及影響，並可追溯至1980年。索羅斯旗下量子基金响去年回報高達32％，證明佢寶刀未老。佢估計，聯儲局4月只會減息0.25厘，而且未來再冇減息空間。雖然歐羅滙價已升7.5％，日圓已升9.1％，索羅斯認為仲有上升空間。

　　花旗推介第一太平（142）、金鷹商貿（3308）。第一太平今年估計每股獲利7美仙，升17.4％，O九點三倍，目標價6.58元；金鷹商貿今年每股獲利23.5仙，升45.9％，O二十五點三倍，目標價 10元。估計今年股市仍然好choppy，但花旗認為可以喺細價股玩尋寶遊戲。

　　技術上睇，道指有條件升上13400至13600點才出現較大阻力，因美股仍然十分超賣。2002年10月道指見底，到2007年見頂，細價股指數上升164％，同期大價股升97％；去年7月羅素二千（細價股指數）見頂，道指去年10月才見頂，證明炒細價股者較買賣藍籌股者更精明。假設美國經濟未來陷入衰退，細價股指數仍有15-25％下跌空間；假設3月18 日股市見底，未來細價股升幅應跑贏大藍籌，一如2002年10月至07年10月。

　　1980年蘇聯入侵阿富汗，金價首見850美元一盎斯；隨着美元滙價回升，金價响1982年見294美元。其後美元滙價回落，九個月內金價升上514 美元，升幅74％。1983年年底美元回升，金價又再回落，並喺1985年見282美元。1986╱87年美元回落，金價喺二十一個月內上升78％，見 502美元。我老曹觀察所得，黃金唔係保值工具，卻係美元嘅死敵！金價最大一次上升潮係1970至80年，由35美元升上850美元，上升二十三倍，理由係世人對美元信心動搖。2001年起美國減息，令美元滙價回落，係推動金價由2000年252美元上升嘅理由。今年3月金價由1036美元回落，理由係美元有回穩迹象。一、黃金唔係保值工具；二、黃金係美元死敵。後市金價點睇？由你對美元滙價後市點睇決定，而非通脹率。

　　今年首季才過去，已令投資者筋疲力竭，你話往後日子點樣過？根據Lipper Inc資料，全球基金第一季平均損失10.6％。去年投資大企業增長股嘅基金平均虧損11.6％，投資小型企業增長股嘅基金者平均損失14.9％；即去年全球專業投資者亦係輸家多於贏家。

　　不認不認還須認，貝南奇終於承認今年上半年經濟極可能出現收縮，但相信今年下半年恢復上升，因1680億美元刺激經濟方案生效，而聯儲局已積極減息至 2.25厘。4月極可能係最後一次減息？如睇十年期債券孳息率已重返2003年水平，即長債利率回落期告終，債券好快進入熊市，因減息周期近尾聲。

　　日經平均指數由1990年39000多點回落，1992年已有唔少分析員認為跌市完成，當年日經平均指數係15000點，理由係政府提供刺激經濟方案。然後係1994及98年政府一而再、再而三提供刺激經濟方案，最後令日本政府成為OECD國家中負債最重嘅國家，但日經平均指數卻跌至2003年4月 7603點才完成整個熊市。

　　呢次由去年10月開始嘅美股熊市又點？





對沖基金全盛日子已過

　　Lipper報道，去年第四季對沖基金資金淨流入137億美元（第三季393億美元），雖然係咁，去年淨流入仍高達1149億美元，較2006年升8％，但已唔及2004年嘅1230億美元。睇嚟對沖基金嘅全盛日子已過去。

　　Philly Housing Sector指數（HGX）出現向上突破，睇嚟美國房地產回落期亦漸近尾聲，進入穩定期。由HGX指數睇，今年第二季至第四季之間，美國房價可能見底，然後喺底部徘徊。房屋建造Sector指數由2005年高峰回落到2008年1月，跌幅達80％。

　　貝南奇或者已成功阻止債務通縮（Debt-deflation）出現，但不能令經濟復甦重臨，最大可能性係美國經濟陷入半死不活狀態，例如美國GDP 進入低增長期，中國、印度、澳洲、巴西、中東產油國及俄羅斯等GDP表現仍係高增長，全球GDP進入重新分配，美國、西歐、日本等國家佔全球GDP比重下降；反而四金磚國、產油國甚至泰國、菲律賓、馬來西亞、印尼等所佔比重上升。波羅的海國家、東歐國家如匈牙利或北歐國家如冰島，由於過分依賴外資流入，情況令人擔心。

　　今天米價進一步上升，世界銀行估計有三十三個國家將面對社會不安。大米係全球三十億人口嘅主要糧食，依家已升至20.26美元100磅，唔少貧窮國家可能無法應付。印尼計劃宣布禁止大米出口；菲律賓過去係大米出口國，今年計劃從美國入口建立糧食儲備。

　　UBS彭博Constant Maturity Commodity指數過去六年上升三倍，同期標普五百指數只上升20％。世界銀行主席話，人類正面對股票價格回落、糧食價格上升嘅困局，即香港人所講嘅「米貴兼運滯」，你說怎麼辦？

曹仁超 - 尖頂與圓底(5 Apr 2008)


　　4月4日，周五。是日清明，掃墓去也。3月18日恒生指數20572 點係咪見底？以過去經驗，底唔係一天整出來嘅，走勢上有「尖頂、圓底」之說，即股市見頂往往十分尖，例如去年10月30日恒指31958點時係尖頂；至於見底之時，通常形成豉油碟形嘅圓底或狗齒形參差底，好少係尖底。何況由去年10月30日與12月初拉出來嘅下降軌仍未升破。但唔排除個別股份（尤其係二線股）見底。經過去年10月30日至今年3月18日下跌後，出現反彈已係估計中事（熊市二期第一隻腳）。「Be greedy when others are fearful」亦係畢非德名句，3月18日美國put╱call比率有59％分析員睇淡，加上恒指响3月17日急跌1000點，都係拋售力量漸被消耗嘅訊號。更何況距離10月30日高點已有35％，反彈前跌幅31.8％可升3620點，家吓已完成；至於能否反彈前跌幅50％？比較上困難，因為响 25000點以上蟹貨十分多。

全球進入反槓桿時代

　　昨天多謝方潤華兄嘅教誨。《論戰》一書乃驅騾之作，較諸商界策馬加鞭者，自然貽笑。雖然明知自己係騾，一定追唔上馬，加以驅趕亦不致過分落後；經四十年努力總算略有所成，何妨獻醜。既可澤及貧困亦可公諸於世作為參考之用。言歸正傳，八十年代經濟環球化加速，令美國CPI增長率進入回落期，引發長期利率下降，令金融市場擴大槓桿比率，大量衍生產品、對沖基金等應運而生。記得1970年我老曹買第一個住宅單位時，銀行係唔做分期付款嘅；當年地產商（新世界發展）提供首期先付樓價一成，打樁完成再付樓價一成，起到三樓時再付一成，入伙時付清……。1970年我老曹揸住8000元現金，膽粗粗買咗一間價值 68000元嘅住宅，幸好1973年8月入伙時已有足夠付清樓價嘅錢。1975年本港銀行才開始提供入伙住宅五成按揭，但樓花仍免問……。

　　美國2007年次按危機，起因係美國金融界唔再遵守樓按首期20％嘅守則，利用種種方法令買樓者可避免先付樓價首期嘅20％；當2006至07年樓價下跌10％時，次按債券立即出問題。相信次按危機之後，全球金融界將進入反槓桿時代（deleveraging），上述係未來大趨勢。

　　1997年第三季起香港樓市泡沫爆破時，香港銀行提供住宅樓70％按揭，即首期要付30％。初期香港樓價只回落30％，仍未出問題，直到樓價跌幅大於 30％，便產生負資產一族。反觀美國樓價由2006年8月至去年12月只回落10％已出現負資產群；如再回落多10％點算？由於3月份非農業就業人口減八萬人，係五年內最大跌幅（2月同1月只減少七萬六千人），失業率係5.1％，估計今年4月底再減息半厘，但幫助唔大。美國面對嘅係信貸收緊期，因為再冇金融機構願意免首期付款而提供樓按，上述才係問題所在！過去十八個月美國住房價下跌10％、美國業主財富損失約3萬億美元，如再回落10％，真係dido。近日道指技術表現轉好，可支持短期上升，但客觀形勢由去年8月至今並冇多大改變，即信貸仍在收緊中。

　　今年首季對中國股票投資者而言亦上咗寶貴一課。响三個月時間內，滬深三百A股指數回落40％，過去兩年證券行內充滿歡樂嘅日子，依家突然變得氣氛沉重，例如爭拗政府救唔救市，寫文章者自己亦嘈起來；為咗賣股唔賣股，夫妻之間甚至打起來。



內地投資者已竭斯底里

　　上周北大教授霍德明表示，政府唔應該用降低印花稅來救市，而遭到萬名網民攻擊。《財經》雜誌主編胡舒立發表文章「何必諱言政府不救市」，亦遭股民謾罵，可見內地投資者已歇斯底里，不能理性討論問題。滬深三百A股指數由去年10月16日6124點回落到上周四最低點3271點，跌幅46％，相信被綁嘅股民唔少，此乃新興市場嘅特性。1970年1月至73年3月恒生指數由100點升上 1774點，上升十六倍；然後又回落至1974年12月150點，下跌91％。滬深A股過去兩年多時間上升五倍，然後响五個月時間內下跌接近50％。唔成熟嘅股票市場因缺乏對沖工具，往往炒單邊（即上升之時大部分人睇好，令股市升完再升，睇淡者只能唔買入，但不能拋空；一旦跌市出現，大部分人陷入恐慌性拋售，亦冇淡友平倉去抵銷拋售力量，形成升市可以升到你唔信，跌市亦可跌到你心驚）。去年10月編織「黃金十年夢」者，今天去咗邊？去年10月唔係有人睇滬深三百A股指數可見10000點咩？內地跌市會否因降低印花稅而改變方向？

　　如參考1973年3月至74年12月香港恒生指數表現，降低印花稅只可引發股市短期反彈，因散戶入市，但機構投資者繼續減持，最後仍係跌市。股市既可出現非理性上升，當然亦可出現非理性下跌。從依家咁多內地投資者寄望政府救市睇嚟，恐怕內地A股指數距離見底之日仍遠，短期或會反彈，但大方向唔會改變。利用鐘擺理論分析──股市往往由一個極端走向另一極端，而唔會响合理水平停下來。滬深三百A股指數可否例外？

越南投資環境未如理想

　　今年我老曹响高盛證券舉辦嘅投資研討會上認識一位讀者，佢喺越南做生意已有數年，有當地親身經驗。佢話我老曹知越南政府嘅貪污情況，較內地有過之而無不及。去年小女一個人跑去越南「自由行」，响胡志明市機場認識一位由香港去咗越南十年多嘅港人，帶佢遊遍整個胡志明市。小女回港後叫我老曹唔好去越南投資，因為好多嘢未上軌道。事隔一年，越南VN指數已面目全非，單係今年第一季已下跌44％【圖】，跌幅超過滬深A股。

　　去年IMF曾要求越南政府好好管制股市！佢地真係咁做，而且做得好徹底：就係「指示」銀行唔再借錢畀市民及公司去炒股票！今年3月因通脹率升上 20％，政府更變本加厲，「指示」銀行停止貸款。股市大跌後，政府要求官方投資機構（SCIC）入市吸納股票去支持股價！3月27日下令上市公司股價每天波幅只可以1％及銀行停止代客出售股票；4月3日改為每天波幅2％。上述行為嚇怕咗外資，唔少外資表示不敢再投資越南股市矣，如有機會便抽調資金離開越南。政府干預市場，好多時都產生反效果。

　　去年金價喺650美元之下時，珠寶業需求十分大；一旦高於650美元，上升力量主要來自投資需要。珠寶業一向佔黃金總消耗70％，投資需求只佔 30％。金價超過650美元以上，支持力卻來自投資需要，形成近日金價飄忽不定。再睇睇美國樓價表現同中國股市表現，擔心世界正走向「減債──通縮期」。 2003年4月時，三十年期樓按利率只有5.25厘，曾引發美國樓價大升；上周房利美提供嘅三十年樓按利率係5.87厘，卻無法再刺激美國樓價上升。 2003年4月美國樓價仍處上升周期，2008年4月美國樓價卻在下降期。食物價格上升、汽油價格上升，加上美國GDP增長率放緩，大大削弱美國人嘅供樓能力（何況今年4月美國樓價較2003年4月高好多）。一旦美國人進入減債期而減少消費，可引發全球通縮；上述情況1990年起响日本出現，1997年第三季起亦响香港發生。OECD國家CPI最主要成分係工資同樓價，唔係食物同汽油。我老曹認為，3月份金價見1036美元一盎斯係另一個泡沫，依家正形成下降軌。如美元滙價穩定下來（例如今年5月），唔排除金價後市進一步大跌！

　　過去七年美元兌歐羅已回落50％（最近兩年跌幅達30％），係1971年浮動滙率以來最低。美元回落嘅理由好多：一、2001年1月1日起減息。二、 2002年前美元兌歐羅偏高。三、去年8月至今受次按危機影響，聯儲局積極減息。今天美元利率較歐羅利率少2厘到3厘，令歐羅變得十分吸引。四、美國 2008年第二季GDP極有可能出現負增長。五、短期人民幣加快升值，估計再升10％。但值得注意嘅係，美國2月份收支赤字只佔GDP 4.7％（一年前超過6.5％）。今年油價急升，2月份美國入口原油261億美元，佔2月份收支赤字45％。即係話如油價回落，美國收支赤字可進一步減少。後市展望美滙短期睇1.6美元兌1歐羅，長期睇1.3美元兌1歐羅。

審慎悲觀好d



4月6日，周日。响公布2007年度業績刺激下，恒指由3月18日持續回升；另一理由係股市經過四個多月回落，走勢上出現嚴重超賣，亦可支持一次大反彈。根據美國Thomson Financial資料，分析員對今年首季純利估計已由新年時嘅上升5.7％改為回落12.2％。恒生指數平均O十四點五倍，已到合理水平，但如企業純利往下走，都係保持審慎地悲觀好一D。

美元方向決定金價上落

　　2003年起，我老曹採用牛眼投資法作為投資核心思想，努力找尋價值超過100萬元嘅概念，過去五年成績算係不俗。2008年價值超過100萬元嘅投資概念响邊度搵？暫時仲未搵到。部分理由係2008年恒指走勢應係長方形，唔再係向上或向下。金價亦進入1000美元以上可沽出、900美元以下可短線吸納嘅框框走勢，影響金價嘅係美元方向而非CPI升幅。3月17日1038.6美元及近日低價876.3美元，已成為金價嘅上下阻力，最終金價破上抑或破下？由美元滙價方向決定。

　　今年响邊個項目或邊個投資可以double your money？我老曹擔心最惡劣日子仍未過去。1980年美國各大銀行大量貸款畀第三世界國家政府（尤其係拉丁美洲國家），由於息率高，第三世界國家政府曾宣布無力償還，當年如美國各大銀行將上述債務撥備，佢地早已資不抵債！1980年聯儲局容許各大銀行以賬面值入數而毋須撥備，其後美資銀行透過供股及每年純利保留而度過危機；到九十年代墨西哥貨幣大幅貶值及阿根廷貨幣危機，美資銀行已能應付。

　　近年出現次按債券危機，理由就係各銀行 2007年12月起必須以市價入賬，結果各銀行須作巨額撥備及大量集資，而且沒完沒了。因為如美國樓價繼續回落但必須一再撥備，更大嘅撥備將令銀行進一步收緊信貸，促使樓價進一步受壓。日本樓價跌咗十三年才見底，跌幅72％，2003年日圓利率減至「零」；香港樓價跌咗六年才見底、跌幅68％，2003年港元利率減至半厘；美國樓價至今只下跌二十一個月，跌幅略多於10％，美元利率仍係2.25厘，係咪已見底？我老曹仲係保持審慎地悲觀好D。

美經濟呈抗藥性

　　八十年代美國對抗衰退嘅方法係增加借貸，由1981年3月至86年美國負債大升，才能令GDP恢復增長（高負債係1987年格蛇略為加息便引發1987 年10月股災嘅理由）。2001年起亦係透過大量增加借貸，令美國GDP重新恢復增長。呢一次由2006年起已增加借貸，過去八季美國已增加7.86萬億美元負債，到2007年12月美國負債已達48.8萬億美元（2007年GDP只有14.1萬億美元），似乎仍無法阻止衰退出現。到2007年，美國必須增加5.7美元負債，才令GDP多1美元【圖】。令人擔心今年即使進一步增加負債，亦無法阻止衰退出現（即美國經濟出現抗藥性），咁就大件事矣！

　　JP摩根大通响3月17日同意收購貝爾斯登，引發股市大反彈，但索羅斯認為3月18日只係「良好的底部」，而非確認終於見底！

　　今年首季越南股市跌44％、滬深A股跌40％、印度股市跌30％，反映新興市場股市升得快、跌得仲快。次按危機唔係發生在美國嗎？點解反而越南、中國同印度股市跌幅仲較美股更大？

　　上周最後一個交易天，上證指數最低見3271.29，不但創今年新低，更出現連續八周跌市。今年首次見機構資金大規模進場，保險資金、QFII、公募基金及一D私募基金開始建倉，一天淨流入70億元人民幣。入市資金包括來自中國平安保險及中國人壽；申銀萬國認為拋空動力逐漸衰竭，部分二三線股更處於「裸跌」行列，多頭動力在慢慢聚集。至3月31日止，八十多家公司公布今年首季業績，其中四家業績預增十倍以上、十家預增五倍以上、五十家預增一倍以上，代表唔少公司响今年仍可延續高增長，最多資金流入嘅板塊係銀行及保險，其次係煤炭板塊；仍在減持嘅有鋼鐵及有色板塊，其次係電器及機械板塊；鋼鐵股面對國際鐵礦石價暴漲衝擊，至於電器及機械板塊則面對人民幣升值壓力。中信金通證券首席分析師錢向勁認為，A股市場由6124點跌至上周四最低時3271點，已完成牛轉熊，即熊市一期已完成，未來發展响3271點附近震盪，並進入熊市二期；依家入市總體上講機會大於風險。

人民幣好快破七迎六

　　重慶東金諮詢公司總經理黃小宇認為，A股十二個月純利估值水平已回到O二十九倍，今年動態市盈率二十倍，已到咗合理估值區，外資可能重新進場吸納估值偏低嘅股份。值得注意嘅係近期部分地產股走勢堅挺，例如萬科、中華企業、保利地產等。

　　救抑或唔救？滙豐銀行研究報告估計，中國政府响奧運前可能宣布一系列救市措施，包括降低印花稅、收緊二線市場發行條例及推出風險對沖工具等，估計A股市場响第二季度反彈機會甚大。摩根大通亦係轉為睇好嘅外資企業。滙豐同摩根大通相信冇內幕消息，睇好係基於分析，各位可參考，但不應盡信。

　　上海世城投資管理執行董事陳家琳估計，4月3日人民幣收7.0192兌1美元，睇嚟人民幣滙價好快破七迎六；6.9兌1美元相信係4月嘅事。

中資金融機構須考慮滙率風險　　復旦大學經濟學院副院長、金融學教授孫立堅認為，一、美國（對中）貿易逆差擴大嘅背景下，要求人民幣升值攻勢愈來愈猛烈，美元貶值已貶得差唔多，依家只有要求人民幣升值，協助改善美國收支逆差。二、外資流入帶動流動性過剩壓力下，人民幣升值對中國利多於害，今天中國已毋須以低成本去競爭出口，為咗好好利用稀缺資源同技術進口，人民幣升值不但有助解決投資過熱、資產泡沫及通脹壓力等問題，同時有助糾正內外經濟發展失衡；人民幣升值被市場認為有助抑制流動性過剩嘅有效手段同必然選擇。人民幣升值當然亦帶來一定負面影響，但有助物價穩定。去年人行採用存款準備金率提升同調整利率，對抑制流動性過剩效果並唔好，滬深三百A股指數去年10月上升到6124點，而今年2月CPI亦同年初指出今年4.8％嘅目標相距頗大。如今提升存款準備金率和加息空間都唔大，只剩番調節人民幣滙價呢招仍可使用，透過人民幣升值去降低通脹率、停止流動性過剩造成物價上漲，投資過熱及資產失衡局面。何況人民幣升值亦唔一定打擊出口企業（例如日本成功嘅出口企業，响日圓升值壓力下仍保持利潤），只會輸掉那些只憑價格優勢嘅企業，佢地不得不停工，讓出空間畀其他有競爭力嘅企業。以日本為例，日圓大幅升值後，日本仍長期保持外貿盈餘，便足以證明。中資金融機構亦應考慮滙率變化所帶來嘅影響，包括如何轉嫁滙率風險，以及尋求更高收益項目，以對沖滙率可能引起嘅損失。

　　中國如要同各國和平共處，人民幣升值係必須走嘅路，當中有危有機，及早處理較束之高閣好。人民幣升值有利旅遊業、能源產業、技術進口依賴行業甚至股票。從投資方向睇，人民幣破七後仍會再升。

日殭屍企業多望窗一族

　　蓋茨响美洲開發銀行舉行嘅會議上認為，中國富起來真係會更好，並預測美國影響力將降至只佔全球5％，因美國人口只佔全球5％。我老曹完全同意蓋茨嘅睇法，並認為二十五年後中國GDP可佔全球12.5％，美國只佔10％。

　　好多人將近期美國經濟同九十年代日本比較，但Wells Capital Management嘅Jim Paulsen認為大有不同。雖然兩者都係地產泡沫爆破，日本減息未能刺激經濟復甦，去年9月美國減息至今亦未能刺激經濟復甦。但美國奉行森林法則，即熊彼德強調嘅「創造中的破壞」。响美國，競爭力較弱嘅公司好快被競爭力較強嘅公司取代或收購，令美國經濟重新朝氣勃勃，因此美國經濟唔可能出現長期停滯不前；反觀日本卻大量存在「殭屍」企業，應倒閉嘅公司卻仍生存下去，加上銀行拒絕將呆壞賬一次過撥備，唔少員工應炒魷魚卻仍留喺企業內，成為「望窗一族」，令日本經濟死氣沉沉。

　　「日圓先生」榊原英資估計，未來六個月內日圓可見90兌1美元，佢估計美國次按危機一、兩年內仍未解決。未來歐洲銀行因宣布受次按影響嘅震撼仍十分大。

　　SoHo中國（410）主席潘石屹認為，今年中國房地產市場已進入「錢少地多」嘅局面，地產商唔肯承認只係掩耳盜鈴，諱疾忌醫到頭來困難同危險只會更大！今年香港地產商响內地突然大聲咗，理由就係香港地產商仍然有銀，成為內地地產商爭取合作嘅對象。

　　上周西班牙房地產採取荷蘭式拍賣方法出售二百一十六個項目，其中一百九十四個收回，一間名為Las Terrazas地產公司購入其中十個，折扣率高達30％。

　　過去十年西班牙房價上升三倍，由去年起回落，從呢次拍賣價睇，房價最少跌幅已達30％，估計仲會進一步回落。西班牙去年GDP只升3.8％（第四季更只有0.8％），今年首季GDP升幅估計只有0.3％；睇嚟西班牙經濟正步入衰退期。

　　根據IMF嘅世界經濟展望報告，全球最偏高樓價嘅國家係愛爾蘭，估計偏高32％；其次係荷蘭，偏高29％；英國偏高28％；澳洲偏高24％；法國偏高 22％；西班牙偏高17％；意大利偏高12％；日本仍偏高12％。反而美國只偏高11％；德國偏高2％，加拿大更偏低3％、奧地利偏低6％。今年少數仍可投資房地產嘅國家有加拿大同奧地利（加拿大係指全國，唔係溫哥華同多倫多，由於華人大量購買物業，上述兩城市樓價亦進入偏高期）。

曹仁超 - 中國人富起來要先有法治(8 Apr 2008)


　　4月7日，周一。恒生指數升314.13、收24578.76；成交994.69億元；期指升439點，收24659點。中移動（941）升4.6元，報128.4元；港交所（388）升3.8元，報152.3元；國壽（2628）升1元，報30.6元。呢次上升恒指能否超過2月4日高點25101點？

　　滬深三百指數升195.12或5.34％，收3845.82。江西銅及柳鋼漲停板。今天出現二個月來最大嘅漲幅。

　　美元止跌回升，兌日圓升1.2％，收102.65；兌歐羅見1.5692兌1歐羅；人民幣仍上升，成7.0018兌1美元。而估計日本4月9日維持利率不變，人民幣好快升穿7算。

　　BNP百利達認為，美股由1914年至今，熊市平均維持十五個月；最長都係四十一個月（1938年）、最短嘅四個月（1987年）。相信2007年10月開始嘅美股熊市到2009年2月先結束。

　　花旗認為，港股進入有吸引力嘅水平，建議分階段吸納；不過，上周機構投資者資金主要流向中國、新加坡及台灣；香港仍面對資金淨流出。

　　滙豐銀行分析部認為，熊市已由2007年10月開始，並認為係W底；3月18日已見第一個底並推介中移動（941）、交通銀行（3328）及新世界百貨（825）；唔排除反彈後又再回落，到出現第二個底先結束呢個熊市。近日回落由外資拋售引發，相信已差唔多並推介吸納中國股票。至於恒生指數，估計呢次反彈可見26000點。

　　摩根大通亦推介香港地產股，如新鴻基地產（016）及嘉華國際（173）等，認為近半年本港地產股表現落後地產，尤其係信和（083）同嘉華國際，短期內可追落後。估計2008年只有一萬零九百八十個住宅單位落成；2009年有一萬二千六百七十個，本港住宅單位一二年內仲係供不應求；除非政府更改土地政策，否則本港住宅樓短缺將長期化。

　　花旗推介中石化（386），估計2008年每股獲利78仙，升19.6％，O八點六倍，目標價14.32元。

各國干預難避免

　　今天《人民日報》發表關於政府救市嘅探討文章。不論係西方國家、香港抑或中國，真正嘅自由市場從來冇存在過，干預係無可避免。七十年代香港財爺夏鼎基美其名叫積極不干預。例如去年8月至今，美國聯儲局一連串行動亦係干預，至於何時應干預、何時唔使？則富爭議性。夏鼎基認為，當市場偏離正常軌道時，政府應進行干預。但何謂正常軌道又有排抝。

　　1994年7月30日中國證監會宣布三項救市措施：一、暫停新股發行及上市；二、嚴格控制上市公司配股規模；三、擴大入市資金範圍。出台後第一天股市指數上升33.2％，响三十三個交易天內由最低點325點升上1052點，上升204.13％，其後又回落一年多，响1996年1月19日見512點，跌幅近半。

　　第二次救市喺1999年5月19日，中國證監會召集全國證券商討論，其後推出改革股票發行體制、保險資金投入及解決證券公司合法融資渠道；6月10日央行更宣布減息；6月14日《人民日報》發表文章堅定信心及規範發展。中國股市指數由5月19日起，喺三十個交易天內上升64％，到2001年6月14日見最高點2245.44，其後出現四年熊市。

　　2002年6月23日係中國政府第三次救市，宣布暫停國有股減持，引發6月24日井噴，但第二天又回落，之後繼續漫長熊市，可以話呢次救市最失敗。

　　2004年2月2日係第四次嘅救市行動，出現國務院關於推進資本市場改革開放及穩定發展若干意見，簡指國九條。股市指數一直上升到4月7日，然後又再回落到2005年6月6日。

　　換言之，1994年至今中國政府曾出現四次救市事件，有些效果良好，有些只有一天反應；2008年4月救抑或唔救?!

　　理柏中國基金市場透視報告認為，內地A股大漲、大跌情況會反覆出現。面對全球性通脹及經濟減速大環境下，以及大小非流通及投資者行為單一新環境，中國股市情況化走勢仲會反覆出現。

　　2008年投資策略呢？一、今時今日才Take shelter係咪太遲？二、投資海外（包括中國）？分分鐘新興市場表現較香港差。2003年4月開始嘅股市日日好時光似乎喺2007年10月結束；之後面對嘅卻係風雨交加嘅晚上。信貸壓碎（credit crunch）最終會唔會令美國經濟陷入衰退或只係GDP低增長？連專家都爭抝緊，我地又點知？3月18日開始進入復原期，由於過去五個月所造成嘅傷害幾嚴重，亦非短期內可以好番。4月中花旗、美林及美國銀行三大金融業巨無霸公布2008年第一季業績，到時撥備幾多？華爾街事前估計係咪足夠？我老曹傾向同意格老睇法（即美國經濟未進入衰退期，未來進入衰退期機會已超過50％）。聯儲局能否短期內恢復信貸市場信心？今天要美國人增加消費必須刺激佢地借貸；响失業率向上及樓價向下環境下，有邊個願增加借貸？


台灣消費世@@釧?br />
　　3月17日貝爾斯登响摩根大通收購下先避免破產，雖然喺咁，道指首季仍回落7.6％、標普五百指數回落9.9％、納指回落14.4％。美國股票基金平均回落10.1％、全球股票基金平均回落 9.6％、中國股票基金平均回落21.2％（Lipper數據）、只有黃金基金今年首季仍升5.2％。問題係商品價格繼續爆炸性上升，抑或進入參差頂？

　　1980年香港工業內移；1984年內部消費行業重新帶動香港GDP上升。反觀台灣，1992年製造業移去長三角，十五年過咗啦，台灣內部消費行業卻未能興旺起來。上述情況會否因馬英九上台而改變?!香港廠商將製造業內移，但寫字樓仍留喺香港，响內地賺咗錢則回港買豪宅兼消費；內地企業亦來港上市，賺咗錢亦响香港買豪宅兼消費，例如體操天王李寧一度係我老曹嘅街坊……楊超更係同屋住。反觀台商卻搬去上海，喺上海買豪宅（或到加拿大及澳洲買豪宅）而唔係番台北市，連消費亦唔番台灣。點樣吸引中國境內二百萬台灣人番台北買豪宅兼消費？

　　單靠台灣牛肉麵兼貢丸係唔得嘅。香港零售業已集全球名牌喺香港（法國時裝喺香港買較巴黎平、意大利手袋响香港亦較米蘭平……）；香港更成為美食天堂（牛排已達美國水平、甜品較意大利毫不遜色、日本刺身媲美東京、法國菜亦同巴黎睇齊）。至於台灣仍停留喺街邊小食時代。乜嘢棺材板、煎蠔仔餅及燒魷魚……。坦白講唔好搞我，自己已一把年紀，點敢再食呢類街頭小食？唔怕膽固醇偏高咩。至於台灣小籠包水平唔及上海嗰邊美味；日本刺身雖較香港平但水準唔及香港。唯一欣賞係台北市交通網絡搞得幾好，例如巴士接駁地鐵方面較香港好，的士司機服務態度亦幾好（雖然東京的士司機服務態度更好，但日本的士收費太貴）。

內地房產潛力大

　　2008年第一季係內地股民嘅悲慘世界，無論你買乜嘢都逃唔出一跌命運！高手也好，低手也好，2008年首季大部分基金都係負增長！人們一直崇尚嘅價值投資法或長線投資理論，都被市場徹底顛覆同無情嘲弄。近期連投資房產亦面對拐點。投資黃金，金價亦一下子跌落嚟；投資古董字畫？自己又冇呢個水平；投資債券基金，收益又如雞肋。2008年我哋仲可以投資乜？真係一個大問題。

　　長遠睇，中國人均收入有一天同香港人睇齊，即係達23000美元一年，到時內地大城市樓價相信亦同香港睇齊。但2007年中國人均收入只有2300美元，幾時才見23000美元？十年、二十年、三十年或者要五十年。從長遠睇，中國房地產潛力好大，前途很好；但短期睇，房價與收入不成比例，短期漲得太快，一旦出現調整便套住咗。日本人叫房產係不動產，即冇法流動。因此，港人收入可以支持今日香港樓價，但內地各城市人收入能否支持各城市樓價，又係另一回事。

　　去年進軍中國資本市場嘅海外基金亦賠本。例如國際私募基金CVC收購珠海中富29％，收購價8.27元一股，4月3日收市價7.59元。16.5億元投資已虧損超過2億元；瑞士豪西蒙集團嘅華新水泥投資，賬面蝕咗6億元；黑石集團去年9月11日以6億美元（45億元人民幣），入股藍星集團20％，該公司佔三家上市公司即星新材料54.27％、藍星清洗 27.08％，以及瀋陽化工33.66％。至今年4月3日止，藍星集團响三家上市公司市值冇咗80億元人民幣，令黑石集團去年9月投資响藍星集團市值唔見咗16億元。瑞士豪西蒙集團（Holim Ltd.）今年2月以每股26.95元買入華新水泥七千五百二十萬股，收購價20億元，二個月唔夠，華新水泥股價已跌至18.6元人民幣，二個月唔夠，豪西蒙集團賬面冇咗30％或6億元人民幣。

　　資本市場上冇永遠嘅贏家，去年中國資金出征海外，抑或外國資金湧入中國，結果都係一樣──蝕本。

　　中國人一向主張勤和儉，事實上，大部分中國人都勤和儉，點解世上最富有國家唔係中國？有人認為，係列強瓜分咗中國財富。中華人民共和國1949年成立後又點？有人認為，係共產制度阻礙經濟發展。1978年改革開放後，中國GDP以每年平均9％速度上升，但我地不妨睇吓東南亞國家、拉丁美洲國家甚至印度，佢地人民何嘗唔係勤和儉？點解無法富起來？反而香港人卻可以富起來？

　　根據美國耶魯大學教授陳志武研究：分別喺產權與合約權益保護機制。簡單點講就係法治。只靠勤和儉只能支持市場經濟發展到一定程度，卻冇法讓一個國家或地區經濟充分地深化，以及讓經濟實現最大化。五十年代至七十年代香港經濟發展便有賴市民嘅勤和儉；情況同東南亞國家一樣；但八十年代香港經濟繁榮有賴產權與合約權益保護機制（簡稱法治）。當產權與合約權益獲充分保護，可令交易成本迅速下降，市場便可以進行自由選擇，以最平嘅成本完成交易，令積蓄透過市場機制流向股票市場及房地產，進一步創造更大財富；反之，政府權力如不受制衡，司法無法獨立，私人產權與合約權益隨時面對行政權力所侵犯。市民對自己所擁有嘅產權唔放心，便會產生財產轉移到別國或減少投資現象。形成國家或社會一旦達到小康局面後，經濟又再停滯不前。


中國人嘅勤和儉過去三十年，已令中國經濟步入小康；未來三十年中國人均收入能否同港人睇齊？再唔係勤和儉因素，而係產權與合約權益保護機制能否獲充分尊重。呢方面好多東南亞國家、拉丁美洲國家甚至印度都做唔到，未來中國可以咩？勤和儉有如打工仔賺錢，收入永遠無法大幅上升。反而產權喺合約權益獲充分保護下，企業才獲迅速發展，市民透過投資可以富起來。例如恒生指數由1970年100點升到今天24000點，上升二百四十倍，創造咗幾多財富？

　　以取得營業執照到開業為例，喺香港只要二天（今天到政府部門辦手續，明天開業）；美國要七天；中國要一百一十一天（唔包括星期六及日，如包括大約需半年）。中國勞動成本雖然平，但交易成本卻十分昂貴；因此，做生意中國仍不及香港方便。

　　香港同新加坡為何人均收入咁高？答案係：一、交易成本便宜。因港人及新加坡人嘅產權及合約權益獲政府充分保障（例如政府不能強佔民居，人民可告政府。由於司法獨立，政府隨時打輸官司。所以港人從不擔心自己產權被政府侵蝕）。政府不與民爭利，只擔任裁判人角色；二、政府唔影響司法獨立權；三、公務員廉潔同高效率。中國能否繼勤和儉之後建立法治社會？決定滬深A股後市點睇。

大行報告仍有價值

　　通脹率急升令東歐由投資帶動嘅經濟，可能面對硬着陸；上述係IMF警告。去年外資向十個新歐盟成員國（東歐）直接投資393億歐羅，較2000年245億歐羅多出60％。但 2001年至今唔少東歐國家工資上升140％，雖然升幅咁大，但工人仍流向西歐國家找工作；因為東歐平均工資每月只有908美元，而西歐卻有4575美元一個月，形成當地勞工不足。估計2008年直接投資東歐資金將大減。

　　美國股票經紀行Schwab問：2007年第三季華爾街一千八百位分析員高估上市企業純利8.2％；第四季更高估33.5％。咁嘅水平邊度需要分析員？近年大行分析報告水平每況愈下係不爭事實。但我老曹認為仍有一定參考價值。佢地對企業純利估計，通常視乎股市水平而打折，例如去年10月股市興旺期，我老曹將佢地嘅純利估計打個七折；今年3月本人將他們純利估計打個九折。不如意事十常八九；投資成功唔係眼光獨到而係策略運用。十項投資中八、九項係虧損都唔怕，因早已止蝕離場；雖然只有一、二單命中牛眼，但因為賺100％回報。即只要命中一單已可抵銷九單虧損；如命中二單便十分和味。

曹仁超 2008-04-09  

65歲最適宜退休


      4月8日，周二。恒生指數跌267.07，收24311.69，成交877.4億元。4月期指回落361點，收24298點，低水。中石化（386）跌4.3%、國泰航空（293）跌2.1%、國航（753）跌3.7%；過去十二個月航空用油價升70%。中遠太平洋（1199）回落6.3%，因高盛降該公司評級，其次係德意志銀行，以及燃油成本亦大升。

英國樓價大跌

　　格老認為呢次次按危機係美國近五十年內最差一次，佢估計美國房價回落响2008年結束，最遲2009年年初。英國樓價3月跌2.5%至191,556英鎊一間，係1992年以來跌幅最大一個月。事前分析員估計只回落0.3%，上述消息令英鎊回落至1.9767美元。

　　紐西蘭商業信心亦跌至三十三年內最低，64%企業估計未來六個月經濟會轉差。紐元兌79.62美仙，估計响9月30日前會減息，房屋銷售2月份跌至七年內低點。

　　米價升至新高成21.5美元一百磅，因菲律賓計劃今年增加入口42%至2.7百萬噸。依家全球存米跌至1983至84年以來最低，過去二十年消耗量卻上升40%，因人口增加。今天响香港大學見到莊陳友兄，佢非常關心非洲兒童唔夠糧食問題；今天响印度及非洲呢類國家仍有十分一人口食唔飽（或唔夠營養）。六十年代我老曹雖然貧窮，但從未食唔飽。不過，有鄰居曾同母親借兩斤米去煮飯餸腐乳。

香港人很幸福

　　1982 年8月中國政府宣布收回1997年7月1日香港主權，林行止兄同我老曹曾响《信報》大駡共產制度行唔通。當年有內地官員來港請我老曹吃飯，並保證香港人响「97年後一定有飯食」！佢此語一出，我老曹呆咗一呆。1982年港人已唔擔心冇飯食，但中國內地仍有唔少人食唔飽。

　　兩地經濟差距咁大，所以引來好多誤會。六十年代港人見面時仍互相問候「食咗飯未？」，今天連內地人亦話節食減肥。但希望大家關心印度及非洲等國家，仍有十分一人口係食唔飽；作為香港人不要身在福中不知福。

　　摩根士丹利對MSCI亞洲太平洋（唔包括日本）2008年純利展望，升幅只有6.3％（其中印尼更只有3.7％、菲律賓跌1.3％）。上述純利升幅能否支持MSCI亞洲太平洋區股市O？

　　BNP百利達亞洲認為，大量投機資金响商品市場活動，造成商品價格偏高。

　　瑞士聯合認為，內地航空股股價仍處泡沫水平，唔建議吸納；不但喺咁，連台灣嘅EVA及中華航空亦唔建議吸納。2007年香港到台灣乘客只有七百三十萬人次，台灣到香港八百三十萬人次；香港到台灣乘客中73％係台灣人，即四百二十萬人次，估計其中58％係過境性質，即一百七十萬人次經香港到珠三角一帶。一旦直航估計有一百萬人次台灣人唔經香港直飛內地；再加上中國自由行及旅行團達七百萬人次，即直航約八百萬人次一年，由中華航空、EVA航空、南方航空（1055）、中國國航及東方航空（670）分享，每間公司增加不足二百萬人次，上述升幅對中華航空及EVA純利貢獻並唔明顯，更加遑論對內地航空公司。對國泰航空而言（包括港龍）2007年接待四百萬台灣人來往台灣、香港佔總乘客量15％，如失去其中50％約二百萬人次，即失去總乘客量7.5％，自然增長扣除國泰响台灣及香港航線失去7.5％乘客量，對國泰航空全年純利影響微不足道。

熊市仍未完結

　　換言之，航空公司股價對直航好處同壞處影響被誇大。國泰受高油價影響，今年純利估計減少45.3％，每股只獲利97仙，現價亦唔見得特別吸引。至於南方航空、東方航空、國航及台灣上市嘅EVA及中華航空更應睇淡。

　　花旗推介新奧燃氣（2688）及玖龍紙業（2689）。新奧燃氣今年估計每股獲利61.6仙，升25.2％，O十八點二倍，目標價16.5元；玖龍紙業今年估計每股獲利53仙，上升12.7％，O十三點一倍，目標價11.3元。

　　The good, the bad, and the ugly！2007年10月前嘅股市係the good時代，2007年11月至08年1月股市已係the bad時代；近日股市已進入the ugly時代。經濟收縮影響正逐步浮現，房按作為自動提款機作用正在消失中，加上食物價格及燃料價格上升開始侵蝕美國人購買力。但標普五百指數平均O仍高達十九倍，較過去平均O十五倍高出最少20％，加上美國GDP進入長期低增長期。因此，我老曹認為3月18日開始嘅上升，只係熊市二期反彈而非熊市結束。 1966年嘅美股熊市糾纏十六年；1999年日經平均指數熊市長達十三年。呢次美股熊市早喺2000年4月開始（2007年10月指數創新高，由美元貶值造成錯覺產生）。

　　受國際經濟形勢影響，今年香港經濟比較上困難；連帶我老曹响決策上同判斷上亦變得小心謹慎，好多投資計劃將暫緩。

　　當前國際資本市場發展局勢唔明朗，投資者想喺今年獲資金增值變得非常困難，响資本市場甚至達到保本亦唔容易；面對銀行存款（港元計）只得1厘息，總不能睇住D鈔票一天一天貶值吧?!

　　去年10月前响股票市場賺點錢睇落好似好容易，點知10月過後股票市場變成「坑子」，一唔小心資本便被「坑了」。離開股市到物業市場溜溜，賺它一個 10％至15％仍然容易，仲有黃金及外滙市場，賺點小菜錢仍然唔算難。踏入今年4月連物業、外滙及黃金市場亦此路不通；2008年只過咗一季，投資理財已咁困難，往後日子點過？唔通就只有眼白白睇住辛苦賺返來嘅金錢，擺响銀行一天一天瘦下去而自己毫無對策？做人有時都幾無奈。

　　兒時睇戲（指粵語殘片），每當有惡人蝦好人時，危急關頭必定出現陳寶珠，出來挽救好人兼擊退惡人。戲院內一見陳寶珠出現便全場鼓掌，大叫陳寶珠嚟啦，好人有救啦！現實生活冇呢回事；甚至摩通救貝爾斯登最初出價每股2美元（趁你病、攞你命）。2007年初以每股140美元買咗貝爾斯登者唔知有何感想？其後加價至每股 10美元……。現實就是咁醜陋。

　　今天投資者們，請Cheer up，因為the worst is not yet over！中國、紐西蘭、澳洲及英國經濟開始進入放緩期；美國經濟增長放緩正逐漸擴散到歐洲、中國、澳洲及紐西蘭。英國已打算減息。


今年是CDS問題

　　彭博報道JWM Partners LLC公司由前長期資本管理公司嘅John Meriwether負責，今年响固定收入對沖基金市場上，至3月14日失去24％資本或虧損10億美元，雖然唔及1998年長期資本管理公司虧損大（當年蝕咗40億美元，由聯儲局出手挽救）。但已被迫出售證券去應付孖展Call。此乃瑞士聯合銀行撥備400億美元而首季虧損190億美元，令主席辭職及德意志銀行撥備25億歐羅（39億美元）後又一單。

　　各位都聽過CDS（credit default swaps），即係為CDO（collateralized debt obligations）提供擔保。今年有45萬億CDO到期，如發債機構無力還款，便由保險機構承擔。保險公司真係承擔得起大量呆壞賬咩？有人話 2007年係CDO問題、2008年將係CDS問題，美林已起訴XL Capital Assurance，因為該公司曾為30億美元CDO提供擔保。

　　美國住房價格回落10％後，暫時穩定下來，高盛估計未來二年美國商業樓價有機會回落21％到26％。嗰D購入CMBS（Commercial Mortgage-backed securities）公司進入有得震冇得瞓時代。根據高盛分析員William Tanona估計，貝爾斯登、花旗、摩根大通、雷曼兄弟、美林證券及摩根史丹尼等，今年第一季為CMBS撥備將達72億美元，因為佢地响此項目上共借出 1410億美元。

　　當美股進入熊市，通常新興市場跌幅係美股一倍或以上。投資新興市場所帶來虧損將陸續公布；例如越南股市3月1日至25日回落21％，今年回落46％。

　　外滙方面，冰島已加息到15厘去支持貨幣滙價，冰島Krona去年11月6日至今兌歐羅回落40％、兌美元回落32％。歐洲從事利差交易者損失慘重；上述情況會否响紐西蘭元上出現？

　　聯儲局已動用60％借貸能力（聯儲局借貸能力係8000億美元，已動用其中4800億美元，仍有3200億美元借貸能力）。好多人以為聯儲局可以印銀紙，印鈔機構叫Bureau of Engraving而非聯儲局，聯儲局只有借錢能力，即從市場上借入資金再借畀有需要機構。因聯儲局有信用兼借貸能力強，至於餘下3200億美元借貸能力能否應付45萬億CDO到期（萬一出事率高於1％）？到時將出現聯儲局亦冇錢借嘅尷尬局面（除非國會立即批准擴大聯儲局借貸能力）。

鼓吹撈底不要信

　　股市經過五個月回落，唔少分析員鼓吹撈底。請問2000至02年10月納指下跌80％期間，分析員發出幾多次撈底訊號？既然佢地事前見唔到2007年 10月股市見頂，點解要信佢地嘅撈底分析？壞咗嘅鐘每天都可以準兩次，但有邊個信唔行嘅鐘？3月18日雖然出現股市指數同RSI背馳可支持一次似樣反彈，但A╱D線並冇上升多少。即除大價股外，細價股冇參加呢次反彈行動。道指交通分類指數由今年1月上升至今代表可見美國經濟唔會出現衰退，只會出現放緩（即GDP增長率可能少於1％）。

　　細細個時睇過鐵金剛主演嘅From Russia with Love!，近年卻冇人注意1998年至今俄羅斯股市上升二十四倍。過去六個月全球股市回落，俄羅斯股市仍升44％！今年申請加入WTO，如獲批准俄羅斯嘅豐富天然資源將改變唔少原材料供求關係，包括石油、天然氣及鐵礦石。今年係咪原材料價格止升期？俄羅斯會否帶來「愛」?!

投機資金炒起油價

　　今年1月美國用汽油較2007年同期減少4％、2月用汽油減少3.2％；全球石油產量今年首季則上升3.5％（需求只上升2％）。第二季產量估計上升3.3％亦超過需求，第三季產量估計上升4.1％。

　　去年7月起石油需求開始回落，點解油價不跌反升？根據華盛頓市汽車專家Ed Wallace分析：係投機資金作怪。2000年只有90億美元响石油期貨市場活動，家吓係2500億美元。即多咗2410億美元流入石油期貨市場將油價炒起！

　　過去人生七十古來稀；古時人類好少能活到七十歲。但到咗今日所有六十歲香港人，大部分可活到八十三歲，退休日子或需延遲到六十五歲或做更充足準備才可退休。有D人仍然六十歲退休，可從事part-time工作，亦可從事顧問工作，有D人轉工目的係減少工作壓力或爭取多D閒假。換言之，呢一代香港人已好少真正六十歲退休（半退休者較多，以便有多D時間從事運動或享受生活）。因為退休後生活係咪寫意，背後要有金錢嘅支持。美國人退休後只有6.4％人口毋須降低生活水準；退休後生活可能較退休前使得仲多（例如享受閒假及增加醫療開支）。

　　我老曹再一次強烈反對四十五歲前退休，太早退休除非家財萬貫不然遲早悶死收場，因為你退休你嘅朋友未退休，遊山玩水六個月後仍可以做乜嘢？如五十五歲重出江湖因同社會脫節，往往以損失慘重收場。由於人類可活到八十三歲，最佳退休年齡應係六十五歲。六十歲或可開始半退休，五十五歲便早咗D。至於四十五歲前就退休，絕對係錯誤選擇（最易發生婚外情或半途再出來做事）。搞到自己上唔到天堂、落唔到地獄，只能半天吊。

曹仁超 2008-04-10

糧食不足係政策問題



      4月9日，周三。恒生指數跌327.12，收23984.57，成交 834億多元。4月期指跌301點，收23997點，略為高水。港股進入第二天下跌，思捷環球（330）跌3.8％，收90元；利豐（494）跌 2.9％，收28.3元；招商局國際（144）跌5.3％，收36.6元；中國石油（857）跌3.6％，收10.26元；中海油（883）跌2.8％，收11.98元；阿里巴巴（1688）跌8.7％，收15.3元。

　　滬深三百指數跌5.22％，收3688.13，反彈四天後又再回落。招商銀行跌5.8％、中石化跌7.3％，因擔心政府進一步抑制通貨膨脹。

　　花旗推介中通服（552）及蒙牛乳業（2319）。中通服今年估計每股獲利28.6仙，升33.3％，O十八點三倍，目標價7.4元；蒙牛今年估計每股獲利81.8仙，升31.6％，O二十三點八倍，目標價33元。

內地樓價有壓力

　　4月8日深圳五幅土地拍賣，其中一幅由深圳振業A股以6.9億元投入，其餘四幅無人出價收回。房貸按揭收緊導致樓市成交低迷，一D中小型嘅地產開發商資金周轉非常緊張，無法參與競拍，加上深圳嘅房價下滑，關外均價普遍已降至萬元一平方米，特價房更低至7000元。自去年12月6日二幅土地拍賣無人出價收回，12月17日三幅土地拍賣亦因無人出價收回，今年五幅土地拍賣能賣出一幅已算有改善。

　　易憲容認為投資者已被股市套住，不要犯蠢再被樓市套住。去年好多人用股票到銀行按揭借錢買樓。依家股票已被套住，因相信房地產可以保值仍然唔肯賣，但可以捱幾耐？最後離唔開惡性拋售。

　　美國人指摘金融機構將樓按證券化造成今天次按危機；基金證券化本身唔係壞事，但做得太濫先出問題。

　　呢次反彈喺咪一個牛陷阱？事後才知道。只知信貸壓碎（credit crunch）仍在進行中，雖然市場上仍充滿資金，例如退休金、保險公司及主權基金等仍揸住唔少資金，但被燒過手指嘅人小心翼翼。去年第三季入市者發現第四季價錢更便宜，去年第四季入市者發現今年第一季價錢更便宜，到2008年第二季，係咪仲有勇氣大量入市或採取「停一停，抖一抖」策略。

　　去年10月滬深三百指數漲到6000多點時，未來純利O亦達到四十倍，唔少分析員仍認為中國股市將一路漲下去，並可以唔受美國次按危機影響，提出de- couple理論。今天滬深A股已回落40％以上，嗰D認為中國股市可繼續上漲十年者，唔知去咗邊？內地股市神話破滅後，房價神話仍繼續，完全忽視樓價已超過年租金回報率三十年嘅現實。今天上海一套一百平方米房子要130萬元人民幣，以上海人均收入1萬多元人民幣計根本上負擔唔起，Every thing has a price！股票及房價亦唔例外。

　　IMF 4月8日發表報告指出，去年10月以來全球金融體系所面對嘅風險至今仲係好大，信貸質量仍在惡化，結構性信貸產品價格仍在下跌，流動性資金漸減少，金融危機正由美國次按抵押貸款市場向外蔓延，例如優質住宅、商業樓市及消費信貸等都被影響。唔單止咁，甚至向其他國家擴散。

美國救負資產家庭

　　今年首季已有二千萬個美國家庭陷入負資產行列，佔全美家庭數字約20％；再加上食物價格上升，汽油價上升，叫佢地點樣增加消費？周三布殊宣布計劃協助十萬個負資產家庭，新計劃叫FHA Secure，估計到年底可幫助五十萬個負資產家庭。根據Mortgage Bankers Association估計，年底負資產家庭將上升至四千六百萬個，其中約2％面對被接管（約九十二萬個家庭）風險。換言之，FHA Secure計劃仍不足夠，FHA由政府提供200億美元，家吓已為三百八十萬個家庭約3650億美元貸款提供擔保。條件係11萬美元貸款如住宅價格跌至10萬美元，貸款者必須減免其貸款至97000美元，FHA才做擔保（擔保後如樓價再跌，不足之數由FHA支付）。

　　英國樓價回落後，信用卡公司响過去六個月將二百萬個客戶信貸上限減少，因信用評估公司Experian宣布今年首季呆賬率上升8.5％。大部分英國人最貴重嘅資產係自住物業，近期倫敦Brighton區樓價已回落5％-10％，Tunbridge Wells回落10％-15％。根據Halifax數字，全英國樓價過去十年由70696萬鎊一間，升至191556英鎊一間，每年平均上升10.5％，過去六個月回落10％左右。其中Yorkshire的Ecclesall仍上升5％，但Leeds情況較差。里茲响英格蘭北部係著名大學城，由倫敦坐二小時火車可到達。樓價一度媲美倫敦，最近一年跌幅便較大，可能外地留學生減少啩。

　　响信貸壓碎前（即2007年8月）聯儲局有7900億美元國庫債券，佔總資產87％，至今已拋售3000億美元國庫債券，並將資金借畀銀行及大證券行去減少信貸壓碎影響。即聯儲局透過拍賣國庫債券集資，將資金借畀銀行或大證券行能力亦萎縮。

　　米價已升至21美元╱一百磅，係一年前二倍或2001年五倍。大米售價係十九年內最高（小麥更達二十八年內最高）。全球大米存量跌至七千五百二十萬噸，係1980年以來最低。聯合國估計今年全球大米出口量較2007年減少3.5％，米價高企令三十三個國家面臨社會動盪。中國主食（水稻、玉米及小麥）自給率達95％以上。但去年中國農產品貿易係赤字50億美元，雖然唔受糧荒威脅，但今年中國農產品貿易赤字應進一步擴大。通脹加股災，正在拖動中國樓價向下；尤其係深圳、廣州、北京同上海。

　　禍福無門、人自招之。1930年美國為刺激出口而通過Smoot-Hawley Tariff Act，類似1998年中國政府為應付亞洲金融風暴而提供出口退稅及向入口抽稅嘅造法；透過補貼去刺激出口，歐洲各國加以還擊亦向出口提供補貼及向別國產品入口抽重稅。此乃著名beggar thy neighbor時代，係引發三十年代大蕭條嘅理由。今天生產農產品各國紛紛禁止農產品出口係咪想餓死你嘅鄰居？starve thy neighbor？如各國皆進行「深挖洞，廣積糧」行為，呢個世界經濟想唔衰退都唔得，因食物需求彈性好細（米價上升一倍，你唔可以食少一半飯）。如各國都禁止糧食出口，糧食入口國只有「深挖洞，廣積糧」，令糧價上升，自我實現，最終引發全球經濟大衰退。

　　其實全球糧食係足夠全人類享用有餘，問題响分配方面。OECD國家糧食太多造成65％人口過胖；貧窮國家糧食太少，仍有十分一人口食唔飽。只要將OECD國家人民每天浪費嘅食物分畀貧窮國家人民，全人類就冇人食唔飽。中國由六十、七十年代食唔飽到今天肥仔、肥女通街跑，證明糧食不足政府政策係主因；貧窮國家所以貧窮理由係政府行政失當而非土地貧脊。

　　自從中國1980年獲美國最優惠國（MFN）地位後，從新興國家入口美國製成品售價逐年下跌直到2004年初；2007╱08年則回升5.6％。雖然資金仍由西方流向東方，但東方廉價勞工愈來愈少，中國CPI升幅達8.6％，越南更達19.4％。

非洲經濟露曙光

　　為支持製造業，中國响非洲投資超過100億美元去獲得礦產，印度响非洲亦有大量投資。印度較中國更積極，索性喺非洲建立工廠生產，為當地人提供就業；亦喺非洲興建發電廠，睇嚟非洲經濟亦進入繁榮期。

　　美元大幅貶值後，通用汽車及福特汽車計劃响美國生產汽車出口到歐洲、中國及拉丁美洲！即今天美元滙價、美國製造業逐漸恢復出口競爭力。係咪代表美元滙價快見底？去年美國出口汽車達506.6億美元（其中又以輕型貨車為主），德國嘅福士、以及意大利嘅快意亦計劃响美國興建新汽車廠。